Musaafir hu yaaron… (Post Tsunami & my life )
Ek arse baad lauta hai musaafir apne ghar me aise,
Sab kuchh lut chuka ho raat beete safar me jaise…
Khaamosh yeh khidkiyaan
Aanewale ke chehre ko taakti hain…
Raushandanon me fansi makadiyan,
Har chhoti badi cheez ko apne jaal me faansti hain…
Inn deewaaron ka rang kyun uda sa hai,
Pichwaade ka darwaaja bhi aadha khula sa hai…
Ghar-ghar nahi rahaa,
Koi khaali makaan ban chukaa hai…
Lagtaa hai jisse jo ban padaa,
Oosne woh yahaan se sametaa hai…
Kuchh door chal kar kadam ruke hain,
Haath jaise kuchh uthaane ke liye jhuke hain…
Lagtaa hai hadbadi me koi apni cheez bhool gayaa hai,
Ya shaayad jaan-bujh kar yeh chitthi yahaan chorh gayaa hai…
“Kya samete koi yahaan se,
Aur kya yahaan chhorh kar jaaye…
Beet rahe hain jo lamhe,
Kal sabhi banenge yaadon ke saaye...”
