Boonden
Gumsum chup chaap wahin khadi rahi,
Khud se baatein chaar karti rahi,
Raat bhar aakhri kinaare pe latakte latakte jaise thak gayi,
Os ki ek boond subah hote hi,
Patte ko chhorh haule se zameen par sarak gayi…
Girna kya hua,
Jaise jhankaar uthaa karti hain paayalon ke thirakne se,
Paayalon ka thirakna kya hua,
Jaise aawaz uthaa karti hain sheehon ke tootne se…
Par kahaan kabhie kuchh kahaa karti hain boonden?
Ek do chaar hoti hain,
Chaaron fir milan-saar hoti hain…
Mil kar bichhadna,
Bichad kar milnaa,
Sab kuchh hone par bhi,
Kahaan kabhie aawaaz karti hain boonden?
